gradution

يوم 5-7 2008

يوم حفلة تخرج الفرقة الرابعة في كلية بنات

يوم اعددنا له الكثير والكثير .. تمني كل منا ان يطبع هذا اليوم في ذاكرتهم الكثير من الذكريات


مهما كبرتم ففي القلب مكانكم ... ومهما بعدتم فكلنا شوق للقائكم

كنت حاملة هم اليوم ده اوي ... (بعد ثلاث ايام من عدم النوم والانشغال عن الحياة بشكل عام)

كله ده علشان نطلعها زي ما اتمنوها

الحمد لله الذي اتمها على خير



مش حتكلم عن اليوم بتفاصيله .. بس حتكلم عن الاشخاص نفسهم عن مواقف عن ذكريات



حلاقي فين الناس الكبيرة اللي استشرها في اي مشكلة في الكلية ... حلاقي فين 4 طفولة يدونا خبراتهم في التربية العملي والمتصلة


مين اللي حيحس بينا واحنا محتاسين في التربية العملي ..


مين حيرفع ايمانيتنا اما نكون واقعين ومحتاجين دافعة جامده ... مين حيقولي تعالي حقلة في المسجد وانا مش عارفة اظبط المواعيد مع جدولي


مين حعد اتكلم معاه عن المنتدى واخر التطورات .. مين حيعد معايا يشوف حل في المشاكل اللي بتحصل ..


مين حيستلف مني اركان التربية العملي .. ومين حيكون مكسوف ياخد من 3 طفولة ركن


مين حيساندني ويديني أمل في 3 طفولة .. مين حيساعدني في ربط العلاقات ما بينهم

مين اللي لو عايز يقولي حاجة حيصارحني بيها من غير ما يتكسف


مين اللي حفضل منتظراه عند المسجد بين المحاضرات ... مين حيقفشني لو هربانة من محاضرة

مين حيقولي نفسي اعد معاكي وجها لوجه ... مين اللي حيصلح الدينا بين الناس وبعضها




دار في ذهني انهارده افكار واحاسيس كتيير ..


كل مكان في الكلية ليه ذكري .. كل فرد منهم كان ليه مكان خاص مختلف عن التاني



كل فرد منهم اثر فيا بشكل معين سواء يقصد ولا لا .. عرفوني ازاي اتعامل مع البشر اللي عندنا في الكلية


اتعلمت منهم حاجات كتير ..


باذن الله مش حنخلف ظنهم فينا ..



اكيد حفتقدهم اوي .. اكيد ححس ان الكلية بعديهم خلاص ..


بس نفسي مينسوناش ... مينسوش والايام والذكريات اللي بين داخل تلك الكلية

ورغم كله ده .. حقولهم مبروووووووووووووك كسرنا وراكم زير .. وربنا يوفقكم في حياتكم القادمة ..